23 September, 2009

قبلني في النور

أنا جاي أتكلم معاكوا النهاردة بحرية كاملة
كنت النهاردة في المعمورة قضيت اليوم كله هناك كان يوم جميل والجو كان ممتع
وروحت انا وقريبي نتمشي جنب الشاطئ
وألاقي جنب كل عمود ولد وبنت وبعدين ولد وبنت
وكل واحد واخد البنت بتاعته في حضنه
وشغال يمسك في أيديها ويفعص ويبوس فيها ههههههههههههههه
كان فيه فيلم زمان أسمه قبلني في الظلام
لكن دلوقتي الفيلم أتقلب بقي قبلني في النور وإلي مش عاجبه يروح
إلي يغيظك أكتر إنهم بنات محجبات طبعا
أنا مش عايز أتكلم عن البنات إلي كانت بترقص ومحجبات أو لابسين أيشارب علي شعرهم علشان مبقاش غلطت في الحجاب بجد الناس دي عار علي دين والله دة أنا لو متجوز مش حقعد مع مراتي أعمل إلي كانوا بيعملوه دة
أنا بصراحة أتكسفتلهم ومشيت علشان مبصش عليهم لكن قريبي بقي قعدوا يصوروا أنا معيش الصور دلوقتي هي معاهم بس بجد صور عيب إني أعرضها علشان لما ألاقي واحد بدقن وواحدة منقبة ودة ماسك أيديها ولزقين في بعض دي لو مراتك متقبلش حد يشوفها كدة وأنت شكلك متدين ومراتك ولا خطيبتك ولا أيا كانت متقبلش إن الناس كلها يشوفوكوا كدة عيب بجد عيب عليا

بجد أنا حزين علي إلي وصلناله من تعري في الأفكار هوة دة التقدم والتحرر من القيود العقلية



ملقتش حد غير

الصـــــــــــــــــــــمــــــــــــــــــــــــــــــــت

رجاء لكل إلي حيقري الموضوع دة يقولي رأيه بصراحة سواء معايا او ضدي وميكتفيش بالقراءة بس علشان نستفيد من أضافته

سلامي ليكم جميعا

حورس
أحمد عنتر

6 Replays:

OlivE said...

لنا الله بجد


وزى ماانت قولت حاجة تضايق

البجاحه بقت فى كل حاجة والله وفى كل مكان

متفرقش بقى مدينه متحضره عن ريف وقريه ممكن تعيش فيها وووووو
وما خفى كان اعظم


ربنا يسترها علينا اجمعين يارب

7oR@$ said...

عندك حق فعلا الموضوع وصل لدرجة تخوف تخليني اخاف من إلي جاي

أحنا رايحين علي فين

خليني أسكت أحسن كلامي مفيش منه فايدة

halaS demahoM said...

بص يا عم الحاج انت
انت تشتري دماغك زي ما عملت بالظبط
ولا تفكر في الموضوع ده اطلاقا
لان كل اللي تملك تغييره حاجه واحده بس
نفسك
استحاله هتقدر تغير الناس كلها
بس بجد بقي عندنا مستوي ثقافي منحدر جدا
وبقي التقليد اعمي
وعشان كده محدش شايف

وبص كمان
متبقاش عامل زي قناة الحياه كده
دايما بتحسس الواحد بالذنب وبتجيب للواحد اكتئاب
يعني يا أحمد ملقيتش اي حاله كويسه تتكلم عليها
عارف ان شفته حالات كتير وده اللي خلاك تكتب
بس بردوا
اهو انت كده
اديتني فكره غلط عن الاسكندريه
وبحمد ربنا
لاننا كنا هننزل المعموره السنه دي
بس الحمد لله منزلناش
انت فاهم قصدي
متدعيش علي ابنك وتكره اللي يقول امين
مديناش فكره غلط عن الاسكندريه
ولما نقولك الاسكندريه وحشه
تزعل
تقبل رزالتي يا حبي
وكان الله في عونك وسائر الشباب
يا رب

7oR@$ said...

بص أنا هاجمت الموضوع علشان أستفزني وذكرت المكان علشان دة المكان إلي شوفت فيه الموضوع والموضوع دة مش بيحصل في المعمورة بس بيحصل في المنتزة وفي أماكن تانية في ألكس ومش في ألكس بس لكن في الزقازيق وفي كل محافظات مصر كمان والعالم كله
أنت مش لازم تيجي تبص المعمورة او المنتزة او أي مكان تاني مش ركن دة مكان كبير

سلامي ليك

Anonymous said...

fe3lan de 7aga fe qemet el bga7a we 3adam el e7tram .el mafrod y7taremo adamet el nas .la2 we kman bt2ol mo7gbat ... 3agebt lak ya zaman.
salamy

7oR@$ said...

Anonymous

عندك حق والله بس حنعمل إيه كل إلي نملكه الكلام ودعاء ربنا إنه يخلصنا من إلي احنا فيه

سلامي ليك